踏入7月份又係時候同大家總結一下，今年上半年播出嘅劇集入面，表演最差嘅男主角。早前有討論區已經出現提名名單，一班網民都好踴躍投票，暫時最高票數嘅五位男主角有邊位呢？！

第五位：《味想天開》黃子恆

黃子恆係無線一直都浮浮沉沉，經常都做一啲唔起眼嘅角色。但喺《味想天開》中有機會成為「男二」，仲要佔好重戲份，無綫擺明俾機會佢上位啦。好可惜網民認為黃子恆做戲太Chok、咬字不清，演技有待改進。

第四位：《流氓皇帝》馬國明

馬國明又慘做炮灰，觀眾批評馬國明喺《流氓皇帝》中個乞丐造型完全唔掂，對鞋太新淨，皺紋唔明顯，皮膚望落去仲好光滑，完全係hea住扮乞丐。有網民話故事內容相當難頂，更覺得男女主角都做得好差。

第三位：《與諜同謀》鄭俊弘

無綫無端端硬捧鄭俊弘做《與諜同謀》男主角，仲要搞到羅嘉良淪為配角襯托佢咁。一班觀眾認為鄭俊弘演技係唔多掂、唱歌好過做戲，甚至有網民形容佢嘅演技係虐待緊觀眾。

第二位：《我瞞結婚了》洪永城

《我瞞結婚了》係由熒幕情侶洪永城和黃翠如主演，本來諗住佢哋可增加話題性，點知收視率卻強差人意。一班網民都覺得洪永城劇中冇演技，唔明佢點可以做到男一；亦有網民覺得佢做主持做得唔錯，但係拍戲真係好一般，認為洪永城比較適合係旅遊節目方面發展。

第一位：《味想天開》洪永城

洪永城真係好犀利，竟然可以包辦曬頭兩位，喺《味想天開》中飾演擁有金舌頭的鄉下仔，仲同蔡思貝做拍檔，呢個組合一聽就知出事。佢係劇中仲要扮黐脷筋，搞到班觀眾聽得勁辛苦，有網民認為洪永城想走王祖藍嘅路線，但唔覺得佢搞笑之餘仲覺得佢好煩。