《射鵰英雄傳》大結局了，緊接會播放由蕭正楠同田蕊妮主演嘅《超時空男臣》，宣傳片亦於近日曝光。故事講述明朝三位臣子袁崇煥、左光斗及李進忠穿越到現代找太子妃郭倩的故事。又系古裝穿越劇，其實無綫都好鍾意玩穿越題材嘅劇目，等我地同大家盤點下啦！

《EU超時任務》（2016）

由王浩信及朱千雪主演嘅《EU超時任務》系一套罕見嘅穿越劇集，唔止可以回到過去，更加顯示出「蝴蝶效應」，即系只要改變咗一件事，所有相關事件都會有所改變，所以渠頭同阿風每次穿越都有唔同結果。呢套劇集更被網民激贊系近年難得一遇嘅神劇。

《張保仔》（2015）

劇集《張保仔》由陳展鵬、洪永城及陳凱琳等主演，主要講述陳凱琳因為追查案件而穿越到兩百多年前嘅清朝時代，意外結識十一貝勒（陳展鵬飾演）及海盜張保仔（洪永城飾演），仲同佢哋發展感情。穿越劇向來都有收視同口碑保證，但唔少網民似乎唔太like, 更表示「套劇好膠」、「好山寨」及「洪永城／陳凱琳／傅嘉莉演技唔掂」等等評語。

《情逆三世緣》（2013）

由「收視福將」歐陽震華及關詠荷主演，劇集貫穿 3 個年代，講述督察袁金昌（歐陽震華飾）錯手殺死女友楊夕雪（關詠荷飾），之後金昌靈魂出竅穿越時空去咗宋代同關詠荷相遇，之後再度出竅去到 50 年代，又再次重遇。

《回到三國》（2012）

劇集由林峯、馬國明、楊怡主演，劇情主要講述一個80後青年，意外穿越到三國時代，結識咗諸葛亮、劉備、張飛、關羽等人，之後有份參與幾場歷史大事。

《巴不得爸爸…》（2009）

由陳錦鴻、吳卓羲、胡杏兒及楊思琦主演嘅《巴不得爸爸…》系一套輕鬆搞笑嘅穿越劇集，講述楚帆（陳錦鴻飾）和楚慈（吳卓羲飾）系兩父子，楚慈喺一次意外穿越時空返到60年代，仲結識咗年輕時代嘅爸爸。唔少網民都覺得好好睇，雖然開放式嘅結局有少少爛尾。

《九五至尊》（2003年）

同一般穿越劇有少少唔同，系講由過去嚟到未來。故事講述呂四娘（張可頤飾） 行刺雍正皇帝（江華飾）時，遇上水龍捲穿越時空嚟到現代，二人學習適應現代生活，動作誇張與現代人做成強烈對比，非常搞笑。

《尋秦記》（2001年）

由古天樂、林峯、宣萱、郭羨妮等主演嘅《尋秦記》絕對系無綫最有名、最成功嘅穿越劇，亦系古天樂嘅代表作，故事講述由項少龍（古天樂飾）被科學實驗送到戰國時期，更利用歷史知識幫助林峯成為秦始皇。